Buhay Probinsya

Hindi ko rin nga maintindihan at hindi ko lubhang maunawaan kung ako baga'y nalulungkot sa nangyayari ngay'on diyan sa atin sa Pilipinas... Noon bagang panahong una'y pakiramdam ko'y mahirap ang buhay pero ako'y masaya sa aking kapaligiran... Noo'y alam mong pagdating ng Mayo ay siguradong sigurado at alam na alam mong pamihadong uulan... Noo'y mahuhulaan mo ang weder porkast eh... kaya nga may tinatawag tayo noong Agua de Mayo eh... yun ay sahod sa unang ulan sa buwan ng Mayo... saka para bagang ang sarap noong damhin ng paligid, kahit na mahirap ang buhay dahil alam mong tahimik at payapa ang buong paligid. Huni ng ibon at unga ng baka at halinghing ng kabayo ang iyong maririnig, tapos ay palakat ng Inay pag nakitang kami'y nakaungkot la'ang at walang ginagawa. Araro kami ng asbar papuntang linang para magtanim ng mais at uulan na nga naman. Sa hapo'y mag-aalam ng baka at baka napulupot na sa pinagtalian.. Pagkapag-alam ng baka ay mangangahoy naman at ng may maigatong dahil pag walang panggatong ay ang sabi ng Inay ay garne; "Ay sa tinamaan kayo ng magaling na mga hamatad kayo, mga kalis ninyo ang pipirperen ko at ng may maigatong ako dini sa sinaing ko"... Ah ah, ay pag di ka umingle ay sya ka... bukod sa may garute ka na ay mag pingot ka pa sa taynga.